ବୁଦ୍ଧ ଦର୍ଶନ

ପରଶେ ପ୍ରସନ୍ନ ଲୁମ୍ବିନୀ କାନନ

    ଆକାଶେ ବୈଶାଖୀ ଜହ୍ନ

ଜହ୍ନ ଜୋଛନାରେ ନିଶି ନାଚୁଥିଲା

    ଆନନ୍ଦେ ଗିରି ନର୍ତ୍ତନ l

ଜ୍ଞାନର ପସରା ମାୟାଦେବୀ କୋଳେ

     ବନସ୍ତ ବୁକୁରେ ହସ

ପୁନେଇଁ ଚାନ୍ଦରେ ଗଗନ ହସୁଛି

    ତାରା ଆକାଶେ ଉଲ୍ଲାସ l

ସଂସାର କଷଣ ଯିବ ଅପସରି

   ଆଶାରେ ସର୍ବେ ହରଷ

ପ୍ରସବ ବେଦନା ଜନନୀ ପାସୋରି

     ସନ୍ତାନ ଦର୍ଶନେ ତୋଷ l

ଜନମ ଉପ୍ରାନ୍ତେ ସପତ ପାହୁଣ୍ଡ

     ଗମିଲେ କାନନ କୋଳେ

ଭୂମି ସ୍ପର୍ଶ କଷ୍ଟ ଇଷ୍ଟରେ ନଦେଇ

     ପଦ୍ମ ଧରେ କୁତୁହଳେ l

ଜଗତ ଯାତନା ହରିବା ପାଇଁକି

    ଧରାରେ ଅବତରଣ

ଦେଇ ଉଦ୍ଘୋଷଣା ବରିଲେ ଶୟନ

     ପଙ୍କଜେ ଗୋପା ରମଣ l